ألوان الرصيف فالمغرب: الأحمر و الأبيض، الأخضر و الأصفر

آخر تحديث: 2026-11-21

الصباغة اللي على حاشية الرصيف (bordure) كتقول ليك واش تقدر توقف حداه ولا لا. قبل ما نشوفو الألوان، خاصك تفرق بين جوج حوايج:

  • التوقف (arrêt): كتوقف شوية، و نتا داخل الطوموبيل ولا قريب ليها، بحال باش يطلع ولا ينزل شي واحد.
  • الوقوف (stationnement): كتخلي الطوموبيل و تمشي.

الرصيف الأحمر و الأبيض

ممنوع التوقف و ممنوع الوقوف. ما تحبسش الطوموبيل حدا هاد الرصيف حتى لدقيقة. كتلقاه غالبا قرب الرومبوانات و التقاطعات، محطات الطوبيس و الطاكسيات، و قدام الإدارات و المستشفيات.

الرصيف الأخضر و الأبيض

الوقوف ممنوع، ولكن التوقف القصير مسموح: تنزل ولا تطلع شي واحد و تزيد. كتلقاه غالبا قدام المدارس و الإدارات و البلايص اللي فيها حركة بزاف.

الخط الأصفر على الرصيف

  • خط أصفر متصل: التوقف و الوقوف ممنوعين بجوج.
  • خط أصفر متقطع: التوقف مسموح، و الوقوف ممنوع.

الرصيف الأبيض ولا بلا صباغة

الوقوف مسموح فالأصل، إلا إلا كانت شي إشارة كتمنعو، ولا كنتي فبلاصة خطيرة (منعرج، قرب تقاطع، فوق قنطرة…).

الإشارة الطرقية هي اللي كتحكم ديما. الصباغة كتديرها الجماعة، و يمكن تكون قديمة ولا مامسحاش مزيان. إلا شكيتي، ما توقفش.

شحال الغرامة؟

الغرامة كتبدل حسب الحالة. الوقوف الممنوع العادي مخالفة من الدرجة الثالثة (غالبا 300 درهم). الوقوف فوق الرصيف ولا فممر الراجلين مخالفة من الدرجة الثانية (غالبا 500 درهم). و الوقوف الخطير، بحال قرب تقاطع ولا فمنعرج، مخالفة من الدرجة الأولى (غالبا 700 درهم). و زيد عليها: يمكن يحطو ليك الصابو ولا يجرو الطوموبيل للفوريان.

شوف حتى: إشارة ممنوع الوقوف · إشارة ممنوع التوقف و الوقوف · الغرامات و المخالفات

أسئلة كيتسولو بزاف

شنو الفرق بين الرصيف الأحمر و الأبيض و الأخضر و الأبيض؟

الأحمر و الأبيض: ممنوع التوقف و الوقوف. الأخضر و الأبيض: التوقف القصير مسموح، و الوقوف ممنوع.

واش نقدر نوقف حدا الرصيف الأحمر و الأبيض غير دقيقة؟

لا. حتى التوقف القصير ممنوع، و تقدر تاخد مخالفة.

إلا كان الرصيف أبيض و كاينة إشارة ممنوع الوقوف؟

الإشارة هي اللي كتحكم: ممنوع توقف.

المصادر: maroctl.com – Arrêt et stationnement au Maroc. المعلومات تقريبية و يمكن تتبدل، تأكد ديما من الأوطو إيكول ولا من NARSA.